RILRU-A KA CHHUI CHHUAH THEIH CHETCHHIATNA HRANG HRANG - I

                           (Khawiah mah chhuah chhawn emaw lakchhawn phal a ni lo)

1. (Lungmawi hi Pangzawl atanga hla vak lo Chhipphir nena an inkara awm a ni. Pangzawl hi an bazarna hmunpui ber pakhat a ni a, Kohhran-ah Pangzawl hnaih zawk mahse Chhipphir Bia-ah an bet thung. Tin, Phaileng khua hi Pangzawl bul Pangzawl atanga chhim thlanglama awm a ni thung a, Kohhran-ah Pangzawl bial-ah an awm thung ani.)

2002 kum khan December thla tir khan Lungmawi kohhran secretary chu bazar pahin Pangzawl-ah lo kalin quarters-ah a lo leng a. " Kohhran committee-in kumin X-Mas chu thupui nei i la, Pangzawl Pastor-in min then sak mai rawh se kan ti" (hetih lai hian Pro.Pastor ka la ni) tih thu min hrilh a. Tichuan Bial dangin chu tianga min beisei chuan tiin lawm takin ka then sak ta a. X-Mas hma chawlhkar hnih vel ala awm ang tih chuan ka thupui then chu Lungmawi kohhran thawn ta lo chuan Pangzawl Bial ami Phaileng kohhran ka thawn ta daih mai! Ngaihtha taka ka awm lai chuan X-Mas chawlhkar a lo thleng ta reng mai. Chutih lai chuan Phaileng kohhran secretary chu bazar pah bawkin Pangzawl-ah lo zinin quarters-ah a lo leng a. Ka Thupui then leh ka thawn tawh thu te, an hmuh leh hmuh lohte kan zawh nak chuan; Secretary chuan, "Kumin-ah thupui neiin X-Mas hman kan tum reng reng lo, i thupui then lo thawn kha kan lo hmu tak a, a ngaihna kan hre lo khawp mai" tih thu min hrilh ta mai! Hmanhmawh taka File kan check nak chuan Lungmawi kohhran min ngenna zawk kha a lo ni reng si a. Tichuan hmanhmawh takin ka thupui then chu Lungmawi lamah ka thawn leh ta a ni. X-Mas ni 3 velin a la dang tih chuan Lungmawi kohhran secretary nen chuan Pangzawl-ah kan inhmu leh ta a. "Ka thupui then kha in lo hmu em? ka tihsual palhhlauh mai a, Phaileng lamahte ka lo thawn pek a lawm le..." tih thute ka hril nual a. Lungmawi Secretary chuan, " Nia, kha kan hmu tlai ta deuh bawk nen; thupui nei lovin X-Mas chu i hmang leh mai ang u kan ti ta a nih kha" an ti mai chu hrilh a hai duh chem chem ngei mai.

2. Bungtlang (Serchhip bul) ah hian Bial hawn hlim atangin Bialtu Pastorin 2009 atang khan kan awm a. Kan lawina chu Bunhgtlang Baptist church, BBC tiin kan lam mai thin. Tum khat chu Kohhran Secretary-in " Biak In Hla Bu (Pulpit-a dah)a bo daih mai a, tum reng vang pawh ni lovin kan lo lain kan lo hawn palh thei a, chutiangte kan awm a nih chuan Biak In-ah lo dah let leh thei ula a lawmawm hle ang" tih thu a puang a. Chawlhkar 3 dawn lai lo dah an awm mai loh avang chuan remchang apiangah a puang thin a, vawi thum aitlem lo chu a puang hman hial awm e.

Tuk khat chu, "ka inkhawm Bag hi a rit nelhnulh  em mai, thil tul lo kan dah then teh ang" tiin kan check ta a. Ka bag-ah hian peng nek nek a awm nual avangin Minute hlui leh note bu thenkhat ka phawr nual hnu chuan peng dang kan check leh ta a, ka hlabu ah chu kan phawrh a, " a kar velah thil tul lo a lo awm takin" ti a kan chech chian nak chuan Pulpit hla Bu, Secretary-in a bo ti a a puan a puan  ngei mai kha lo ni chuan!

Dah mai bik ta lo chuan insawi felna remchang melh pahin "ka thusawi hunah ka dah mai teh ang" ka ti rilru a. Nilai zan ka thusawi tur ding chhuak chuan, "Pulpit hla Bu bo kha ka bag-ah a lo awm reng alawm le" kan tichiah mai chu inkhawm zawng zawng kan nui ta hem hem mai a ni. Bialtu Pastor berin chawlhkar thum emaw dawn lai ka lo puanhnuai reng tih an hriat meuh chuan inkhawm mah ni i la khap daih chi rual an ni ta lo a nih kha.

3. Bungtlang 'S' Bial hi 2004 atang khan ka Bial tawh a, ka Bial lai chuan Bunbgtlang 'S' khaw chhungah hian Kohhran 2 chauh an la awm(tunah chuan 3 an ni ta). Pakhat zawk chu Bungtlang Kohhran an inti deuh kher a, a dang pakhat chu Elim Kohhran an ni.

Sunday tuk khat chu Elim kohhran-ah nau hlan tur an awm diah a. BCM kohhran-ah nau kan hlan hian Heng hi kan tihdan phung indawt dana a ni:

i) Nu leh Pa-te hnenah thutiam 3 kan zawt hmasa thin. Chungte chu;

- In fate hi pathian hnenah hlan in duh tak tak em? (Duh tak tak e... ti a chhan tur)

- In fate mit hmuh leh beng hriatah hian Isua Krista zuitu anga awm  in tum zel thei ang em? (thei ang ... tia chhan tur)

- In fate hi an lo puitlina an lo seilen thlengin Pathian thutaka hruai leh zirtir in intiam thei em? (tiam/Thei e... tia chhan tur) te a ni

ii) Thutiam zawh hian naute lu chungah kut nghatin hlanna kan nei a, tin;

iii) Certificate hlanna leh tawngtai sakna pawh kan nei bawk thin.

 Nau hi za chuang ka lo hlan tawh avang leh kum eng emaw zat 'nauhlan' kan lo tih thin tawh avang hian (nauhlan chauh ni lo inneih tir, mithi vui, lungphun, sacrament sem dan etc) bel hle tawhin ka inhria a, amaherawh chu tihsual palhte a awm thei tiin inven nan Pastor manual emaw tawi fel taka paper thema chhut sa ka hum tel zel bawk thin.

Tuntumah erawh chuan engin nge min mawlh pawh ka hre lo. Nu leh Pa-te hnena 'thutiam zawhna' ti hmasa ta lo chuan an fate lu chungah chuan kut nghatin ka hlan ta mawlh mawlh mai. Ka tih zawh hma deuhin thiltih hmaih ka nei tih ka hre chhuak ta. Rulruin, 'Nu leh Pa-te intiamna neih tir hauh lova nauhlan chu a fuh dawn hlek lo' tiin ka hlan zawh chuan tiang hian tisual awm lo takin kan chhunzawm ngawt a. "Tunah Nu leh Pa-te hnenah zawhna pathum ka zawt ang a, tichan certificate hlanna leh nau kan hlante tan tawngtai sakna kan nei leh ang" tiin.

Buaina ral a lian e... tih ang mai, chefuh dawn riaua ka inhriat lai chuan ka che fuh dawn ta hauh lo. A chhan chu, Nu leh pate hnena zawhna hmasa ber-ah hian "In fate Pathian hnena hlan in duh tak tak em?" tih a ni tlat mai, Nau lah chu ka hlan zo chiah a ni si...haire hai, engtin chuan ka ti dawn ta chu ni maw?. Nu leh Pa-te hmaah chuan ka ding renrawn a, "Tun tum chu zawhna pahnih chiah kan inzawt ang.." tiin a pahnihna atang khian zawhna leh thutiam ka neihpui ta a, Pastor chu sawi loh Kohhran member pangngai pawhin vawng vek lo mahse 'nau hlan dan kalphung leh zawhna' hi hriat tlanglawn a ni si, Nu leh Pa zinga 'a inti bel (nau hlan dan) zual' chuan tui mang lo zetin (nuihza nui ngam si lovin) min chhang tlingtla ve hram a ni e. Mipui lamin (ka khunkhan loh phah der si lova) min nuih lem lo nain ka che fuh lo ve viau chuan ka hria.
 (Tin, ngaihtuah let changin, Kohhran serh leh sang ningnel lo zeta sakhaw puithiam ten unintentionally a kan chhuah chang hian a lo dangsawngtu-te hi an zahawm cham chem thin. Achhan chu khunkhan takin, thenkhat phei chuan 'rilru dam leh ngaihthat phah nan' serh leh sangte hi an hmachhawn a, felfai lo leh zahawmna hloh thak khawpa tih hi tuman kan palzam theiin ka ring lo. Amaherawh chu sawi chhuak vek duh ni i la, Pastor zawng zawng deuhthaw hian hetiang hi kan tawng vek tawhin ka ring).

Bonus:

* Bungtlang 'S' Biala ka awm lai bawk hian LIKBK(Lairam Isua Krista Baptist Kohhran) Upa min pakhat (a hming chu sai lo mai ang) nelawm zet mai hi Quarters-ah lo lengin kan inkawm thin a. Rambuai laia a thil tawn pakhat tihian min hrilh a.

"Ka Lunglei kal/zin hmasak ber tum chuan chhungte kan neih awm reng reng ka hre lova, hmel hriat loh in-a thlen ka zah bak-ah chutianga han zawh ngam awm reng reng pawh ka nei lo. Lunglei thlen hma deuh atangin eng tin nge ka tih ang tih ka lo ngaihtuah lawk char char a, tichuan Civil hospital ka pan a, dam lo angin ka insawi a, ka in-admit tir ta a ni. Ka bazar duh chuan ward fan loh lai changin a rukin ka chhuak thin a, ka mamawh chu eng tin tin emaw ka lam khawm ve mai a, mahse ka buai rukna ber zawk chu rambuai lai a ni si a eng tin nge buaina tawk lova Tawipui leh hmun danga sipai duty ka kal pelh leh tak ang? tih hi a ni. Rei tak ka inngaihtuah hnu chuan tumkhat chu damdawi in ek In-ah hian seal chhut - lehkha pakhat hi ka hmu fuh ta hlauh mai a, ka thlep tha a tichuan ka haw ni tur a lo thlen chuan ka bungrua tlemte nen chuan ka haw ta a ni. Engtin tin emaw sipai check gate thenkhat chu pumpelhin ka kal tlang mai a. Huphurawm ber chu Tawipui check gate paltlang a ni. Tawipui chu kar lovah ka thleng leh ta a, tichuan seal chhut lehkha them ka ah kha ral khat-ah duty chu ka hmuh ta a, en chiang mang hlei lo hian Seal inchhu a hmuh chuan Pass pangngai ka nei turah a ngai a ni tehchek aniang chu vanneih thlak deuhin min kal tir ta a. Buaina pakhatmah tawk lovin chu seal chhut hmang chuan Bungtlang 'S' thleng ka kal thei ta a ni." a ti ve mauh mai.

(To be continued)